Jobless ka ba? diay sulbad sa imong problema

CEBU, Philippines - Ang Department of Social Welfare and Development(DSWD)-7 mipahibawo nga ang ilang buhatan nanginahanglan karon og dul-an sa usa ka libo ka kawani alang sa ilang proyekto sa lainlaing lugar sa Central Visayas. Si DSWD-7 Regional Director Mercedita Jabagat mipahibawo nga 806 ka trabahante ang ilang gikinahanglan alang sa pagpahigayon og National Household Targeting System for Poverty Reduction.

Ang maong mga kawani langkoban sa 548 ka community facilitators nga gradwado sa social sciences, nursing graduate ug licensed nurse; 93 ka deputy area coordinators nga mga civil engineering graduate o licensed civil engineer, 72 ka area coordinators nga gradwado sa upat ka tuig nga kurso nga related sa social development; ug 93 ka municipal financial analyst nga gradwado og business course, management o accounting.

Tahasan sila sa paghimo’g pakisusi kun ang nakabenepisyo sa mga government financial aid nagpabilin ba nga labing kabos sa nasud.

Ang pagpahigayon og special validation sa mga benepisyaryo ubos kini sa Social Pension for Indigent Senior Citizens and Modified Condition Cash Transfer (MCCT) Program. 

Ang programa gibase sa kamanduan ni DSWD Secretary Corazon "Dinky" Soliman nga sutaon kun ang programa sa gobiyerno napahimuslan ba gayud sa labing kabos.

Ang maong programa gikatakdang magsugod pipila ka buwan gikan karon.

Ubos sa Social Pension program, ang mga kabos g’yud nga senior citizens makadawat og P500 nga tabang kada buwan alang sa pagpalit og mga tambal.

Ang gitawag og Modified Condition Cash Transfer mohatag usab og cash grants sa mga pamilya nga anaa sa kadalanan o kadtong wala nay balay nga kapuy-an, nomadic indigenous people, o kadtong anaa sa layo nga lugar nga maglisod pagbisita sa mga health centers ug pagpadala sa kabataan ngadto sa tulunghaan.  (BANAT NEWS)