Kooperatiba sa Bulacao hayan palayason

CEBU, Philippines - Ang kadagkoan sa usa ka Homeowners Multi-purpose Cooperative sa Barangay Bulacao nagpakisayod karon sa City Hall kun kinsa gayud ang tag-iya sa luna nga giugbokan sa ilang opisina.

Si Rudy Ibundas, presidente sa Cabangcalan Urban Poor and Resettlement Multi-Purpose Cooperative (CUPREMCO) nagpatabang ni Konsehal Alvin Dizon nga hatagan sila og katin-awan kabahin sa luna nga ilang nahimutangan.

Matud ni Ibundas nga sulod sa 12 ka tuig nga milabay makatulo na sila nagbalhin-balhin og lugar nga gitarokan sa ilang opisina sa kooperatiba ug nabalaka sila karon kay giangkon na usab ang ilang giukopahan nga luna sa tunghaan.

Sigun sa suwat ni Ibundas nga gipadangat sa City Hall ang kadagkuan sa Bulacao Community High School mireklamo sa pagtukod sa building sa kooperatiba diha sa luna nga matud pa kabahin pa sa gihatag kanila sa gobyerno alang sa tunghaan.

Si Ibundas miingon nga ang kanhi barangay kapitan sa Bulacao nga si Celerino Cabanca, Sr. maoy mi-disenyo sa lot allocation sa maong tunghaan ug wala maapil sa luna sa tunghaan ang gitukoran sa cooperative building.

Naglaum si Ibundas nga dili na unta sila papahawaon pa sa ilang nahimutangan sanglit wala na sila’y kuwarta nga magasto pagpatukod og laing building. (BANAT NEWS)