Managsuong ‘rapists’ nadakpan
CEBU, Philippines - Gidakop sa mga polis ang managsuong lalaki nga nalutsan og warrant of arrest sa kaso nga pagpanglugos nga ang ilang biktima mao ang usa ka minor de edad nga babaye nilang silingan sa Cobe Housing, Barangay Canduman, Dakbayan sa Mandaue.
Ang gidakop alas-3 pasado ang takna sa hapon niadtong Biyernes didto sa ilang panimalay mao si Kimpee Avila, 20, ug ang 17-anyos niining manghod nga lalaki nga mga lumolupyo sa maong dapit.
Si PO1 Jerome Guardario sa kapolisan sa Presinto 6 sa Mandaue City Police Office (MCPO) miingon nga ang team sa Investigation Detection and Management Bureau (IDMB) sa MCPO nga gipangulohan sa ilang hepe nga si Senior Inspector Jimmy Portes maoy nagdakop sa mga suspetsado.
Ang pagdakop ilang gibase sa warrant of arrest nga giluwatan ni Judge Estella Alma Singco sa Branch 55 sa Regional Trial Court (RTC) 7 nga nagbase sa maong dakbayan. Matud pa ni PO1 Guardario nga nahitabo ang gipasangil nga pagpanglugos sa minor de edad niadtong Abril 2013. (BANAT NEWS)
- Latest
