Van salesman gitulis

CEBU, Philippines - Usa ka van salesman sa kompanya sa sigarilyo ang gitulis sa duha ka wa pa mailhing mga tulisan niadtong Huwebes sa buntag sa barangay Atabay, lungsod sa Alcoy.

Ang biktima giila nga si Romel Estonilo, 33, nagpuyo sa Lapu-Lapu City ug van salesman sa usa ka distributor og sigarilyo, kauban sa drayber niining si Johnny Senor Oliveros, 26, taga Ginatilan, Cebu.

Ang duha mangolekta unta sa maong dapit ug dihang sila miabot kalit silang gipangtionan og armas ug mideklarar og tulis.

Matud ni PO2 Erlan Salonoy sa Alcoy Police Station nga nahinabi Banat News, nga ang maong mga tulisan  giingong nanginom pa og softdrinks sa tindahan nga kolektahan unta sa mga biktima. “Giatngan na ni nila (tulisan) daan ang sakyanan sa biktima, mura’g dugay na ning gipanid-an nila ug kahibaw na sila unsang adlawa mangolekta ang biktima,” matud ni Salonoy.

Nakuha gikan sa biktima ang koleksyon nga P196,000 ug usa ka gold nga singsing nga nagkantidad og P12,000 ug gimandoan silang duha pagsulod sa van ug gikandadohan sa gawas.

Ang mga suspek miikyas sakay sa usa ka Honda Wave nga motor nga ang plaka duna ray nakasuwat nga “726.” Padayon pa gihapon ang imbestigasyon sa kapolisan alang sa pagsikop sa mga tulisan.(Athena Bea T. Del Carmen ug Juliet C. Cardente, CNU Interns/EIM)(BANAT NEWS)