Kinarnap nga motor gi-chopchop na
CEBU, Philippines - Duha ka mga kinawat nga mga motorsiklo ang na-recover sa kapolisan apan gisugdan na kini og chopchop sa usa ka gipasanginlang carnapper diha sa barangay Lusaran ning dakbayan sa Sugbo.
Ang grupo sa Theft and Robbery Section gipangulohan ni Chief Inspector Noli Cernio misaka sa bukid human nakadawat og report nga kabahin sa mga kinawat nga motor nga anha bungkagon sa usa ka Edelson Goc-ong.
Apan sa pag-abot sa mga polis, nakabantay si Goc-ong ug daling miikyas ug gibiyaan ang duha ka mga motor nga gi- chopchop na.
Matud pa ni Cernio ang duha ka mga Honda XRM nga motorsiklo nga ilang na-recover gipanag-iya ni Niel Sacanay, 28, taga barangay Babag 1 ug Ramonito Menoza, 38, taga barangay Lusaran.
Si Cernio miingon nga ang grupo ni Goc-ong mao ang responsable sa mga pagpangawat og motor sa bukirang mga barangay.
Gibutyag ni Cernio nga kasagaran sa pangawaton mao ang Honda XRM tungod kay sayon ra kining paandaron gamit ang improvised nga yawe.
Ang mga makawat nga motor pisa-pisahon ug paliton usab sa mga drayber og habalhabal sa barato nga presyo.(/EIM)(BANAT NEWS)
- Latest
