City Hall mikanselar sa kontrata sa fuel supplier
CEBU, Philippines - Gikanselar na sa siyudad sa Sugbo ang kontrata niini sa usa ka kompaniya nga tigsuplay og krudo ug gasolina human kay nasuko si Mayor Michael Rama nga mihunong kini sa pagsuplay nga walay abiso.
Gikumpirma ni City Administrator Lucelle Mercado ang pagkanselar na sa kontrata sa Phoenix Petroleum Company kay wala gayud sila malipay nga miundang kini pagsuplay og gasolina sugod kaniadtong Abril 11.
Gitataw ni Mercado nga bayran sa City Hall ang mga nasuplay nga lana sa Phoenix sugod niadtong Enero hangtod sa Abril.
“Di man jud na mahimo nga dili nato bayaran atong mga obligasyon because that’s always the Mayor’s directive,†matud pa ni Mercado.
Matud ni Mercado nga mibisita kaniya ang taga Phoenix niadtong Miyerkules ug miingon nga adunay bayranan ang syudad mao nga nihunong sila sa pagsuplay.
Apan giklaro ni Mercado nga aduna’y kwarta ang siyudad ug ang Phoenix lamang ang nilikoy sa ilang obligasyon.
Samtang wala pa’y bag-ong supplier og fuel ang siyudad, nag-emergency purchase usa kini og gasolina ug krudo alang sa usa ka buwan nga konsumo sa mga sakyanan.
Wala hinuon maapektahi ang paghakot og basura bisan nagnihit ang fuel. (Jo-Anne Archival, CNU Comm Intern/RUB) (BANAT NEWS)
- Latest
