Mga nasunogan sa Lorega naglisud

CEBU, Philippines - Mga biktima sa sunog sa Lorega-San Miguel, dakbayan sa Sugbo mihulagway nga lisud gihapon ang ilang kahimtang bisan pa og hinay-hinay na sila’ng nakabalik og tukod sa ilang mga balay.

Si Ally Linte nga adunay upat ka anak nabalaka sa kahimtang sa ilang panglawas kay gawas nga wala pa sila’y kuryente wala usab sila’y klarong pansayan.

Human sa gihimong re-blocking, uniporme na ang gidak-on sa ilang luna nga katarokan og panimalay nga may sukod nga “12 ft. x 13 ft”. Apan ang laing biktima sa sunog nga si Visitacion Intinia nagkanayon nga ang maong gidak-on sa ilang balay mas maayo na lang kun itandi sa walay kapuy-an o kapasilongan.

Aron dili sila maghuot pagpuyo sa gamay’ng luna, kadto’ng mga dagko’ng pamilya nga adunay kwarta nagbutang og ikaduhang andana.

Si Cebu City Administrator Lucelle Mercado mipahibawo nga adunay laraw nga magbutang og arko diha sa entrada nga bahin sa bag-ong karsada nga nahimutangan sa gipangtukod nga kabalayan aron nindot kining tan-awon.

Si Mercado miawhag sa mga nasunogan nga mosalmot sa livelihood programs nga gipasiugdahan sa siyudad ug dili kini magsalig sa pinansiyal nga hinabang nga ihatag sa gobiyerno.

Dugang ni Mercado nga daku og matabang sa ilang inadlaw nga panginahanglanon ang maong mga livelihood programs.  (BANAT NEWS)