‘Rapist’ napakgang nadakpan
CEBU, Philippines - Nasikop ang usa ka construction worker human kini gipasanginlang misulay og lugos sa usa ka 19- anyos nga dalaga nagpuyo sa Daanbantayan, Cebu.
Ang suspetsado giila nga si Gilbert Villamor, 36, lumad nga taga Pasay, Libertad, Manila, ug nagtrabaho sa maong lugar dili pa lang dugay.
Sumala pa ni PO1 Byran Dencing sa Daanbantayan police kalit nga misulod sa katulganan sa biktima ang suspek ug dayong sumbag sa tiyan ug nawong, ug dihang naluya gilayog kini ug gihinol ang mga pribadong bahin sa lawas sa dalaga.
Apan nakasinggit ug nakapangayo og tabang ang dalaga hinungdan nga mikaratil og dagan ang suspek ug naapsan nga nagdala na kini og bag ug gituohang nagpaabot og bus padung sa Cebu City. Samtang usa ka 12-anyos nga bata’ng babaye mipasangil sa iyang ig-agaw nga miunay og molestiya kaniya niadtong milabay’ng adlaw diha sa ilang balay sa dakbayan sa Talisay.
Ang biktima mitug-an kang PO3 Shindey Taboco nga niadtong Miyerkules sa kaadlawon nakamata siya sa kasakit sa iyang kinatawo ug nakita niya ang suspek sa iyang tapad ug nagsige og molestiya kaniya.
Ang biktima mitug-an nga gibati siya og kahadlok sa iyang ig-agaw kay nagumon kini sa ginadiling drugas. (BANAT NEWS)
- Latest
