Pabiling luwas sa MERS-CoV ang CV

CEBU, Philippines - Nagpabiling luwas ang Central Visayas gikan sa Middle East Respiratory Syndrome Coronavirus (MERS-CoV) sa pagkakaron, matud sa lokal nga opisyal sa Department of Health. Kini human migawas nga negatibo sa maong sakit ang 23 ka mga pasyente samtang wala pa mahibaw-i ang  laing duha ka indibidwal.

Gipahibaw sa pangulo sa Vicente Sotto Memorial Medical Center (VSMMC) Doctor Gerardo Aquino nga nadawat sa iyang opisina ang resulta gikan sa Research Institute for Tropical Medicine (RITM) sa kaulohan gahapon sa udto.

Dugang pasabot ni Aquino, 12 sa 13 ka pasyente sa VSMMC ang migawas nga luwas sa MERS-CoV ug tungod niini, gipapauli na sila gikan sa isolation room kagahapon sa hapon.

Wala pa mogawas ang resulta sa usa ka pasareho nga gi-quarantine sa Negros Oriental.  Gipasabot ni Doctor Mari Leo Fidel Pataray nga wala nay tambal nga gidapat sa gipagawas na nga mga pasyente nga nag negatibo.

Matud ni Department of Health 7 assistant regional director Doctor Lakshmi Legaspi, dunay 26 ka tawo nga gibantayan ang ilang buhatan apil na niini ang 25 nga ilang nakit-an samtang nagpabiling usa ang wala pa gihapon mipatim-aw.

"Ang katong upat mi-promise man nato nga mag-house isolation lang sila. Pero tungod kay negative sila, dili na sila kinahanglan ma-quarantine," pasabot ni Renan Cimafranca nga mao ang hepe sa Regional Epidemiology and Surveillance Unit sa DOH.

Sa 25 ka mga naeksamin, 18 ang na-admit sa lain-laing tambalanan ug gi-obserbahan sa ospital samtang pito ang wala magkinahanglan nga i-quarantine.

Samtang pangitaon gihapon ang nag-inusarang pasahero sa Etihad Airlines flight EY 424 gikan sa Abu Dhabi nga mitugpa sa nasud Abril 15 nga wala mipatim-aw aron makuhaan og laboratory test, matud ni Health Emergency Management Staff chief Doctor Expedito Medalla.

Si Cimafranca mipasabot usab nga dili mameligro ang mga polis nga motabang kanila kay igo ra man sila maoy mangita ug ang DOH personnel na maoy makighinabi ug modala sa mga pasyente ngadto sa tambalanan. (BANAT NEWS)