Konsehal Dave gamiton sa DENR pagpalig-on sa kaso batok WT

CEBU, Philippines - Ang kadagkoan sa Department of Environment and Natural Resources (DENR)-7 mipadala na og suwat-awhag ngadto ni Cebu City Councilor Dave Tumulak aron mohatag siya og affidavit kalabot sa iyang pamahayag nga ang WT Construction maoy responsable pagkahanaw sa mga kahoy gikan sa Sergio Osmeña Road sa dakbayan sa Sugbo. 

Matud ni Eddie Llamedo nga tigpamaba sa DENR-7 nga adunay mga interview si Konsehal Tumulak ug nakutlo ang iyang pamahayag sa nakita niya sa CCTV footage nga ang WT Construction maoy iyang gitumbok nga nanguha sa mga kahoy.

Ang DENR miisyu og cease and desist order (CDO) nga nagmando sa WT Construction sa paghunong sa pagpangibot sa mga kahoy taliwala sa karsada nga ilang gisemento.

Matud ni Llamedo nga mahimo lang kini nga bakwion ang CDO kun matuman na sa Department of Public Works and Highways (DPWH) ang gipanglatid nga mga kondisyon. Usa sa ilang kondisyon mao ang paghulip sa pag tanom og 7900 ka kahoy sa nawagtang nga 79 ka puno-an sa mga kahoy nga missing pa hangtod karon. Ang DENR-7 nagpatabang na sa NBI-7 aron makit-an ang missing pa nga mga kahoy ug aron pagpalig-on pa sa ilang kaso nga gipasaka batok sa WT Construction. (BANAT NEWS)