Relo nga balor P200 mil giprenda ra og P200

CEBU, Philippines - Gipresentar atubangan sa mga tigbalita ang suspek sa pagpangawat sa mga mahalong relo ug mga alahas niadtong Sabado de Gloria nga mokantidad og kapin P4 milyones.

Naghilak nga miatubang sa media si Gilbert Matugas, 25, nagpuyo sa Salinas Drive Extension, Lahug, Cebu City.  Nakakuha og impormasyon ang Criminal Investigation Branch (CIB) gikan sa usa ka Adrian Alison kabahin sa relo de pulso nga giprenda kaniya og P200 sa suspek.

Ang maong relo usa ka Bulgari watch, matud pa mokantidad karon og P200 mil. Tungod sa maong impormasyon, daling giadto sa CIB ang balay ni Matugas ug didto ila kining naabtan lakip na ang usa ka Lito Mancao nga maoy gitumbok ni Matugas nga maoy mastermind sa maong pagpangawat. Apan abtik kaayong nakaikyas si Mancao kinsa usa usab ka drayber sa habal-habal. Nakuha gikan kang Matugas ang usa ka kalibre 45 nga pistola nga adunay upat ka bala.

Laing mahalong relo nga Ferrari  ang na-recover sa mga polis gikan sa usa ka langyaw nga giingong giprendahan sa mga suspek. Ang maong relo giprenda lang og P1,200 sa mga suspek apan kini nagkantidad diay og P300 mil. Padayon pa karong gipaninguha sa kapolisan nga ma-recover pa ang ubang mga relo ug mga alahas nga mokapin pa og P3 milyones.  Si Matugas nga nahinabi sa mga tigbalita miangkon nga wala siya masayod nga mahalon ang maong mga relo. Gihimakak usab sa suspek nga iyaha ang nakuha nga armas.

Giawhag ni IDMB Chief Aileen Recla ang uban pang mga tawo nga giprendahan sa maong mga mahalong relo ug mga alahas nga mokooperar sa kapolisan aron dili sila maapil sa makasohan. (BANAT NEWS)