Lima ka pasahero gipapangita
CEBU, Philippines - Gipapangita pa gihapon karon sa Department of Health ngadto sa kapolisan ang usa ka pasahero nga wala gyud mopatim-aw sa ilang buhatan aron magpa-medical examination ug ang upat pa ka mga pasaherong gikan sa Middle East nga human nagpakuha og specimen sample mikagiw na ug milihay sa pagpa-quarantine.
Gibutyag ni Regional Epidemiology and Surveillance Unit (RESU) chief Renan Cimafranca nga una nang mitando ang upat nga magpakuha og sample ingon man mopaubos sa quarantine sa Vicente Sotto Memorial Medical Center aron sa pagtino kung duna ba silay Middle East Respiratory Syndrome (MERS)-Corona Virus apan kalit nausab ang ilang mga hunahuna ug mibalibad nga magpa-admit.
"We are trying to trace these four who initially agreed to submit for testing and isolation but only submitted to the specimen sampling and not isolation as initially agreed. They were listed on the manifest (of the monitored flight from Middle East). After the sampling, they could no longer be reached to the address that they provided," matud pa ni Cimafranca.
Ang upat nalakip sa 400 ka pasahero nga misakay sa Etihad Airlines flight EY 424 gikan sa Abu Dhabi nga gimonitor karon sa DOH ug sa Philippine National Police tungod kay dunay usa ka pasaherong Filipino nurse nga nagpositibo sa maong virus sa medical test didto sa United Arab Emirates.
Ang maong nurse, nag-negatibo hinuon sa gihimong checkup dinhi human boluntaryong nagpa-quarantine atol sa iyang pag-abot niadtong Abril 15.Ang DOH nagpatabang na sa PNP subay sa hangyo ni Health Secretary Enrique Ona sa pagdakop niadtong magdumili sa pagpailawom sa eksaminasyon ingon man quarantine tungod sa hulga sa pagkatap sa maong sakit dinhi sa nasud.
Sa iyang bahin, ang tigpamaba sa Police Regional Office 7 P/Supt. Renato Dugan miingon nga mahimong modangop sa labing duol nga presinto kun ang pasaherong gipangita di mokooperar sa DOH.
Gimantala sa website sa DOH (www.doh.gov.ph) ingon man sa ilang opisyal nga Facebook page ang pangalan sa 43 ka pasaherong wa pa magpa-checkup.
Dugang ni Cimafranca, nga miabot na sa 25 ang gi-monitor karon sa DOH nga pasahero sa flight EY 424 ingon man laing flights nga gikan gihapon sa Middle East. Sa laing bahin, si Dr. Maria Joycelyn Gonzalez, Quarantine Medical Officer mibutyag nga hasta mga overseas vessels nga modunggo sa nasud kinahanglang dunay health declaration checklist sa mga crew niini. (BANAT NEWS)
- Latest
