NFA di kapugong pagsaka sa presyo sa commercial rice

CEBU, Philippines - Giangkon sa National Food Authority(NFA-7) nga walay mahimo ang ilang buhatan sa pagsaka sa presyo sa mga commercial rice sa kamerkadohan dinhi sa Central Visayas bisan pa man og nagsugod na ang ting-ani sa mga kahumayan sa nasud.

Nasayran nga sa niaging bulan nisaka og P2.00 ang presyo sa bugas tungod sa nihit nga supply sa bugas. Apan hangtud karon wala gihapon kini mous-os  bisan og daghan na ang stocks sa bugas nga niabot dinhi sa Sugbo ug sa Central Visayas.

Ang tigpamaba sa NFA-7 nga si Ma. Lucia Rosales mitug-an sa Banat News nga di sila maoy mo-regulate sa presyo sa mga commercial rice kay ang ilaha mao man ang pagsigurong kanunay nga dunay paigong stocks alang sa rehiyon nga mapalit sa mga konsumidor sa mas barato nga presyo. Gibutyag ni Rosales nga daghan na ang supply sa bugas karon dinhi sa Sugbo ug ubang probinsiya sa Central Visayas gikan sa Central Luzon, Isabela ug Mindoro.

Gitambagan ni Rosales ang mga konsumidor nga mopalit na lamang og mga NFA rice sa ilang mga retailers karon nga mahal ang commercial variety niini. Ang NFA rice nagpabiling P27 ang kilo. (BANAT NEWS)