City Accountant sa Talisay nanghunaw
CEBU, Philippines - Si Talisay City Accountant Viluzminda Villarante mipirma kagahapon og “waiver of accountability†kabahin sa sweldohan sa mga kawani sa Talisay City College (TCC).
Ang “waiver†nagpasabot nga kun mogasto og dugang salapi ang dakbayan sa Talisay alang sa sweldo sa mga kawani sa Talisay City College nga lapas na sa gigahin nga budget wala siya’y tulobagon. Ang dakbayan sa Talisay migahin og P12 milyones nga budget matag tuig alang sa TCC apil ang sweldohan sa mga kawani. Ang mga non-teaching personnel magdawat kini og P6,500 nga sweldo matag buwan.
Kapin na sa 30 ka non-teaching personnel sa TCC ang wala pa makadawat sa ilang sweldo sa milabay’ng duha ka buwan mao nga nangayo sila’g tabang sa konseho sa siyudad.
Gipasabot ni Villarante nga ang legalidad sa presidente karon sa TCC nga si Richel Bacaltos kinahanglan nga ma-settle usa didto sa korte human nga si Mayor Johnny De Los Reyes mitudlo og laing presidente nga si Paulus Mariae Cañete.
Gibutyag ni Villarante nga “naguba†kun naghinobra ang budget sa TCC hinungdan nga wala masweldohi ang nahisgutang non-teaching personnel.
Kaniadto sa panahon sa kanhi presidente sa TCC nga si Dr. Tomas Ramos ang TCC duna kini 54 ka magtutudlo apan karon miabot na sa 83.
Panahon ni Ramos lima lang ang non-teaching personnel apan karon miabot na sa 33. Gipasabot ni Villarante nga walay budget ang siyudad nga mahatag ngadto sa sobra nga kawani sa TCC. (BANAT NEWS)
- Latest
