71-anyos gisulong gipusil sa silingan patay

CEBU, Philippines - Patay ang usa ka 71-anyos nga lalaki human gipusil sa iyang silingan sa sityo Bulahan barangay Carmen dakbayan sa Toledo sa nakalabay’ng adlaw. Si Enrique Eben Sr., biyudo, gipusil patay sa iyang silingan nga si Rolando Toyogon alyas Rolly, 24, usa ka traysikad drayber pulos nagpuyo sa nahisgutang lugar.

Sila si Police Inspector Gilfred Baroman uban nila ni SPO3 Henry Acosta, SPO2 Larry Pili, PO3 Gerfil Geollina ug PO3 John Ricafort  nga miresponde sa maong hitabo nagkanayon nga nagkalalis ang biktima ug ang suspek kinsa dugay nang adunay panagbangi.

Gilabay pa og bato sa suspek ang panimalay sa biktima ug wala maka- agwanta mikuha kini sa wala matino nga kalibre sa armas dayong pusil sa biktima diin maayong pagkalungag sa tiyan niini. Misuway sa pagluwas ang anak nga si Enrique Eben Jr. sa iyang amahan apan gipusil usab kini sa suspek sa duha ka higayon ug swerte nga nakalihay kini ug wala maigo. Daling gidala sa Toledo City hospital ang biktima apan nakabsan  usab kini sa iyang kinabuhi.

Samtang nagpabilin nga gawasnon ang suspek kinsa padayon pang gipangita sa kapulisan. (BANAT NEWS)