Tinun-ang Nigerian nga hubog nakatulog sa karsel

CEBU, Philippines - Gipaslak sa selda sa Fuente Police Station sa Cebu City Police Office ang usa ka Nigerian human kini wala moplete sa gisakyan niining taxi kagahapon sa kaadlawon.

Giila ang langyaw nga usa ka Gabriel Olom, 27 anyos, usa ka tinun-an sa pagka-seaman sa usa ka maritime school sa dakbayan sa Sugbo.

Ang mireklamo mao ang taxi drayber giila nga si Ruel Ylanan, 33, lumad nga taga Langin, Ronda.

Matud pa sa drayber misakay kaniya gikan sa Capitol Site ang suspek  ug gusto niining magpahatod sa iyang gipuy-an, apan sa pagbayad na niini wala na kini kwarta, hinungdan nga nangita kini og ATM machine aron mag-withdraw.

Apan sa matag ATM nga adtoan sa drayber nabantayan niini nga walay makuha nga kwarta ang maong langyaw hinungdan nga nakahukom si Ylanan nga mangita og polis aron kini ipadakop.

Sa pakighinabi sa Banat News ngadto sa maong langyaw, giangkon niini nga hubog siya atol sa hitabo.

Gipasabot niya nga wala siya maka-withdraw og kwarta sa ATM machines tungod kay dili na kini makatunong sa ensakto nga personal identification number (PIN) gumikan sa kahubog.

Giangkon hinoon niini nga iyang sipyat ang maong panghitabo ug andam kini nga mobayad sa P1,000 nga bayronon sa taxi drayber ug pag- atubang sa kasong estafa nga gipasaka kaniya.

“I was drunk, it was a honest mistake, I did not blame the taxi driver or the policeman, there just doing their job, so sorry, my fault, honest mistake,” matud pa sa langyaw nga si Olom. (BANAT NEWS)