Sikyu nga mipatay sa Briton gikasohan na
CEBU, Philippines - Gipasaka kagahapon ang kaso batok sa usa ka security guard kinsa giingong mipusil patay sa iyang amo nga Briton. Sumala pa ni PO3 Alfredo Mandal, case investigator sa maong kaso nga kasong murder ang ilang gipasaka batok kang Melchor Alciso, Jr., 42, taga barangay Cabulisan, Hinundayan, Southern Leyte , tungod kay duna kini “intent to kill†sa biktima.
Wala na tubaga ni Alciso ang pasangil batok kaniya diha sa atubangan ni state prosecutor Rustom Presas kay iyaha na lang kining atubangon sa korte, si Presas wa morekomendar og piyansa alang sa suspek.
Kahinumduman nga niadtong Sabado sa gabii gipusil ni Alciso si Anthony Gilchrist, 34, tag-iya ug manager sa Fish Buddies Dive Shop Resort sa Malapascua Island sa Daanbantayan, Cebu human ang panaglalis.
Matud pa gikasab-an sa biktima ang akusado kay late na kini og 40 minutos sa iyahang duty sa alas-7 sa gabii ug giingong hubog usab kini niadtong tungora.
Si Edison Salazar, 20, trabahante sa dive shop nagkanayon nga nakakita siya sa akusado nga mipusil kaduha ka higayon ngadto sa biktima. Matod niya pagkahuman sa duha ka buto nahagba ang biktima.
Sa interbyu kaniya sa mga tigbalita, miangkon ang akusado nga iyang gipusil ang biktima tungod sa iyang kapungot kay giyawyawan siya niini, hinuon nagbasol siya sa hitabo apan uwahi na ang tanan.
Ang British Consul na maoy mopahiluna sa lawas ni Gilchrist aron madala kini sa ilang nasud. (BANAT NEWS)
- Latest
