TRS magpatabang sa mga pawnshops

CEBU, Philippines - Hatagan og kopya sa hepe sa Theft and Robbery Section (TRS) sa Cebu City Police Office ang tanang mga pawnshops sa dakbayan sa Sugbo human sa insidente sa pagpanglungkab sa PC Hills sa Lahug.

Si Chief. Insp. Noli Cernio nga nahinabi sa mga tigbalita miingon nga gusto niyang magpatabang sa mga pawnshops pag-report kun ugaling dunay mga mahalong relo nga iprenda sa ilang establisamento nga susama sa anaa sa lista sa spot report.

Dugang ni Cernio nga wa siya magtuo nga usa lang ka tawo ang mibuhat niadto sanglit daghang finger prints ang ilang nakuha.

Nagtuo siya nga dili pa dayon kadto idispatsar sa mga kawatan ug sagad niini mga duha o tulo pa ka adlaw usa nila ibaligya o iprenda. Ang maong mga alahas ug collector’s watches nagkantidad tanan og gibanabanang P4 milyones.

Apan wala gisalikway sa TRS ang posibilidad nga inside job ang maong hitabo ug usa kini ka anggulo nga ilang gitutokan.

Laing anggulo nga ilang gitan-aw mao ang pagsulod gyud sa mga kiriwan og kamot sa maong balay nga gipanag-iya sa magtiayong si Kate Anzani, 34. Nadiskubrehan nila kini pag-abot nila gikan mibakasyon niadtong Sabado sa buntag.

Matud ni Cernio nga dali lang nakatkat sa mga kawatan ang balay tungod kay sa luyong bahin sa balay niini mubo ra man ang ilang koral bisan dunay barbed wire sa ibabaw.

Miingon si Cernio nga itandi nila ang mga fingerprints nga ilang nakuha sanglit naputos og finger prints ang bintana sa kwarto sa anak sa magtiayon. (BANAT NEWS)