Amahan ug anak nadakpan
CEBU, Philippines - Nasikop sa kapolisan ang amahan ug anak nga gituohang level 2 drug pusher sa Sityo Dasiga, Barangay Don Andres Soriano (DAS), dakbayan sa Toledo sa miaging Biyernes.
Ang mga dinakpan giila nga si Santos Cabiles, 49, ug Shawn Julius Cabiles, 20, ulitawo ug pulos nagpuyo sa Barangay DAS.
Matud ni Toledo City Police Chief Michael Anthony Bastes nga nasigpatan ang mga suspek nga nag-inom og ilimnong makahubog daplin sa karsada hinungdan nga gisikop sila pinasikad sa warrant of arrest.
Si Regional Trial Court (RTC) Branch 29 Judge Ruben Altubar maoy miisyu sa warrant aron dakpon ang amahan ug anak tungod sa kaso nga giatubang nila sa korte. Atol sa ilang pagkasikop, nakuhaan si Santos og tulo ka tag-as nga pakete sa gituohang shabu nga mobalor og P1,000 samtang si Shawn Julius nakuhaan og gagmay’ng pakete nga mobalor og P600 ingon man mga drug-sniffing paraphernalias.
Kini ang ika-upat nga higayon nga nasikop ang maong mga suspek ug gikatakdang pasakaan na usab sila og kaso’ng kalapasan sa Republic Act 9165 o Comprehensive Dangerous Drugs Act. (BANAT NEWS)
- Latest
