Mga honor students sa Talisay hataga’g cash reward
CEBU, Philippines - Sobra sa P200 mil ang magahin nga budget sa kagamhanan sa dakbayan sa Talisay alang sa ipanghatag nga cash reward ngadto sa mga honor students nga migradwar diha sa mga publikong tunghaan sa kabarangayan sa siyudad.
Si Talisay City Public Information officer Vincie Monterde nga nahinabi sa Banat News kagahapon nagkanayon nga ang first honor sa elementary ug high school makadawat og P3,000 nga reward matag usa, P2,000 sa second honor ug P1,000 sa third honor.
Mikabat ngadto sa 24 ka estudyante sa elementarya ang mga first honor ug 17 sa high school. Sa second honor sa elementary 24 usab ug 17 sa high school sa third honor sa elementary 24 gihapon ka buok ug 17 gihapon sa high school.
Matud ni Monterde nga ang maong reward ipaagi kini og payroll ug giproseso na ang dokumento niini. Ang mga honor student pahibaw-on unya sa siyudad kung pwede na nilang makuha ang ilang cash reward.
Gibutyag usab ni Monterde nga ang siyudad mohatag og scholarship ngadto sa mga kabus nga Talisaynon sugod sa pagbukas sa klase.
Matag barangay dunay 10 ka mga scholar ang kuhaon sa siyudad diin ang buot mo-apply sa scholarship moduol lang kini sa kapitan sa ilang barangay aron makahibawo sa mga rekisitos nga gikinahanglan. (BANAT NEWS)
- Latest
