P200 mil nga bisekleta gikawat
CEBU, Philippines - Kapin sa P200 mil ang kantidad sa mga butang nga nakuha sa wala pa mailhing kawatan nga nakasulod sa usa ka balay pinaagi sa pagkatkat sa koral didto sa Sitio Lapnis, Barangay Kalubihan, Barili.
Ang balay nga gikawatan gipanag-iya ni Jay Ruiz, 48. Ang nagbantay sa balay nga si Amelia Borbon, 62, ug Jena May Borbon, 26, maayo nga paghinanok diha’ng ang kawatan misaka sa balay niadtong miagi nga kaadlawon.
Nakuha sa kawatan ang mahalon nga mountain bike ni Ruiz nga nagkantidad og P200 mil apil pa ang iyang cellphone. Giapil pa gayud sa pagkuha sa kawatan ang duha ka cellphone sa caretakers.
Gisusi pa sa kapolisan kung kinsa ang maong kawatan kay nakuhaan man kini og footage sa CCTV.
Samtang nadakpan sa kapolisan sa Carcar ang duha ka lalaki nga kawatan og mga alambre sa telephone company.
Ang nadakpan mao sila si Rogard Cabañero, 30, taga Minglanilla, ug si Glen Iglesias, 44, taga Lawaan, dakbayan sa Talisay. Ang duha miguba sa cable cabinet ug miputol sa mga linya sa telepono sa Globe Telecom.
Nasakmit gikan sa mga suspetsado ang 23 metros nga pinutol nga alambre ug usa ka 357 Magnum revolver.
Ang duha nagtingkagol karon sa Carcar City Police Station. (BANAT NEWS)
- Latest
