WT pasakaan og kaso karon

CEBU, Philippines -  Ang Department of Environment and Natural Resources (DENR)-7 mopasaka karong adlawa og kasong kriminal batok sa WT Construction Incorporated ngadto sa Prosecutor's office.

Ang kasong ipasaka may labot sa kalapasan sa section 3 Presidential Decree 953 "for illegal destruction or damage of planted trees" sumala sa tigpamaba sa DENR-7 Eddie Llamedo.  Ang WT Construction Inc maoy gidudahan nga nagbunlot sa mga kahoy, nga gikuhang kontraktor sa Department of Public Works and Highways (DPWH)-7 aron pagtrabaho sa P289 milyon rehabilitation project sa Sergio Osmeña Blvd.

Samtang, ang kagamhanan sa siyudad sa Sugbo plano usab nga ipadayon ang pagpasaka og kaso sa maong kontraktor kun ang City Legal Office makahatag na og investigation report.

Si Mayor Michael Rama wa miuyon sa gisaysay ni Dr. Librado Macaraya, Executive director sa City Parks and Playground Commission, nga pabayron na lamang ang WT og P1.7 milyon hulip sa 88 ka nawalang kahoy.  Sumala ni Rama angay lamang nga dunay manubag sa krimen gumikan kay nilapas man kini sa balaod.  (BANAT NEWS)