Ilegal parking space gihawanan

CEBU, Philippines -  Kabahin sa karsada nga gihimo’ng parking area sa usa ka hotel sa dalan D. Jakosalem ug Ranudo gihawanan sa mga kawani sa Cebu City Hall kagahapon.

Ang daplin sa dalan Ranudo nga nahimutang tumoy na nga bahin dapit sa eskena D. Jakosalem wala g’yud hawani sa tagdumala sa Indiana Hotel bisan og gipadad-an na kini og suwat sa City Hall.

Matud ni Raquel Arce nga pangulo sa Prevention Restoration Order Beautification Enhancement (PROBE) nga wala tumana sa tagdumala sa hotel ang gipadala nila nga notisya.

Gimandoan sa PROBE ang tagdumala sa hotel nga kuhaon sa karsada ang gibutang nila nga pisi ug baril sanglit usa man ka karsada ang gihimo nila nga parking area.

Mga motorista nga kanunay’ng mag-agian sa mao nga dapit mireklamo kay maglisod na sila pag-agi human nga ang katunga sa Ranudo Street gibutangan na og pisi nga koral alang sa parking area sa hotel. - (BANAT NEWS)