Wanted nadakpan, miangkon sa salaod

CEBU, Philippines - Nasikop sa kapolisan ang usa ka wanted human kini malutsi og warrant of arrest sa pagpanglungkab ug pagpangawat sa usa ka balay sa Barangay San Vicente, Isla sa Olango atol sa pag-igo sa bagyo’ng Yolanda.

Si Lester John Patigdas, 20, ulitawo ug nagpuyo ra usab sa Barangay San Vicente, gidakop base sa warrant of arrest nga giluwatan ni Regional Trial Court (RTC) Judge Anna Marie Melitante.

Matud ni Patigdas nga siya ug duha niya ka kauban maoy milungkab sa balay ni Gabby Appari kaniadtong Nobiyembre 8 atol nga ang Sugbo gikuso-kuso sa Yolanda.

Gibiyaan ni Aparri ang iyang balay ug mihiklin siya sa mainland Lapu-Lapu tungod sa kahadlok sa kakusog sa maong bagyo.

Gibana-bana nga moabot og P100 mil   ang kantidad sa mga butang nga nakawat gikan sa balay ni Aparri human nila gub-a ni Patigdas ang bildo sa bentana sa balay.

Nangangkon si Patigdas nga wala siya bahini sa halin sa ilang kinawat sa duha niya ka kauban.

Lima ka buwan nga si Patigdas nagtago-tago ug wala na mobalik pa sa ilang dapit sa San Vicente human sa pagpangawat.

Diha’ng mibalik na si Patigdas didto sa ilang dapit sa miaging semana, ang mga silingan niya abtik kaayo nga mireport sa kapolisan.  (BANAT NEWS)