PNP kuwang og imbestigador

CEBU, Philippines - Ang kadagkoan sa Cebu Provincial Police Office (CPPO) mopahigayon og “investigation training” aron maghatag og dugang kinaadman sa kapolisan sa lainlaing police station aron mahimo sila nga batid nga imbestigador.

Si Talisay City police chief Reycel Carmelo Dayon mibutyag nga problema sa kapolisan dili lang sa probinsiya kon dili lakip na sa ubang mga lugar ang kabahin sa “investigation” diin kuwang sila og bansay nga mga imbestigador.

Gibutyag ni Dayon nga ang provincial headquarter maoy mopasiugda sa training ug ang lokal nga kagamhanan maoy mogahin og salapi aron ang kapolisan sa ilang dapit mopaubos sa bansay-bansay.

Matud ni Dayon nga duha ka sakop sa Talisay City Police Station ang ipaubos sa training aron mapun-an ang ilang imbestigador.

Gipasabot sa opisyal nga sa pagsulbad sa krimen ug bisan gani sa pagpa-blotter sa mga kaso kinahanglan nga ang polis makamao g’yud sa pamaagi sa pag-imbestigar ug makahibalo kun unsaon pagsukit-sukit ang biktima aron makakuha sila og vital information nga mabasehan sa kasulbaran sa krimen.

Hinuon matud ni Dayon nga ang kapolisan sa Talisay makamao kabahin sa investigation apan usa lang sa iyang police investigator ang “certified” kon napaubos na og training isip investigator. Ang Talisay nagkinahanglan usab og dugang communication equipment sama sa handheld radio ug dugang sakyanan o patrol car. Si Konsehal Valeriano Ylanan misaad nga mohatag og 10 ka handheld radio sa kapolisan samtang si Mayor Johnny De los Reyes misaad usab nga mohatag og dugang duha ka patrol car sa kapolisan.  (Brenda D. Batuto/RUB)

Migradwar  og livelihood training

Mikabat sa 78 ka tinun-an sa Talisay City Livelihood Training Center ang migradwar sa milabay’ng semana ug pareho nga may nakat-onan na nga panginabuhian.

Ang mga migradwar nga mipaubos sa livelihood program sa kagamhanan sa Talisay mieskuwela og mga vocational courses nga gilangkuban sa housekeeping, beauty care, garments sewing ug smaw welding techniques.

Ang training center sa Talisay accredited sa Technical Education and Skills Development Authority (TESDA). Mikabat sa 21 ka tinun-an ang migradwar sa housekeeping, 22 sa beauty care, 12 sa garment sewing ug 23 sa smaw welding.

Si Mayor Johnny De los Reyes malaumon nga makakita unta dayon og trabaho ang maong mga migradwar subay sa ilang nakat-onan.

 Ang kagamhanan sa siyudad padayon sa pagsuporta sa mga training program alang sa mga kabus nga Talisaynon aron sila makakat-on og panginabuhian.  (BANAT NEWS)