Center for street children

CEBU, Philippines - Ang pagtukod sa Center for Street Children sa dakbayan sa Mandaue paningkamotan sa kagamhanan nga mahuman karong tuiga, ilabi na nga giabagan kini sa pribadong sektor.

Si Mandaue City Treasurer Regal Oliva, sakop sa komitiba nga gimugna alang sa kapistahan sa dakbayan sa Mandaue karong tuiga, miingon nga ang katukoran sa Center for Street Children nga nahimutang sa Sitio Dunggoan, Barangay Basak maoy nag-unang proyekto sa kagamhanan.

Gipasabot ni Oliva nga nagkantidad og P90 milyones ang maong proyekto nga maoy unang gahinan sa matigom nga salapi nga mahipos sa pasiugdahan nga kalihokan sa tinuig nga pangilin karong tuiga.

Matud ni Oliva nga naglakip sa kalihukan nga ilang gituohan nga dako og ikatabang alang sa katukoran sa maong proyekto mao ang gipasiugdahang indigay sa kaanyag nga naglakip sa Prince and Princess, Queen of Mandaue, Miss Gay ug Miss Mandaue 2014.

Ang maong mga indigay sa kaanyag giabagan usab sa taga Mandaue Inc. nga nakighiusa alang sa kalampusan sa maong kalihokan sa tinuig nga pangilin karong tuiga.

Si Mayor Jonas Cortes miingon nga ang Center for Street Children maoy magsilbing pinuy-anan sa libudsuroy nga kabataan nga hatagan sa pag-alima sa kagamhanan sa tuyo nga mahimo sila nga mapuslanong lumolupyo sa dakbayan. (BANAT NEWS)