Kanhi BEO nagpabadlong

CEBU, Philippines - Ginang nga gitaktak pagka-Barangay Environmental Officer (BEO) sa Barangay T. Padilla giingon nga nagpabadlong pinaagi sa paglabay og mga basura atubangan mismo sa iyang panimalay. Si Michelle Binolirao, taga Barangay T. Padilla, giisyohan og Citation Ticket sa mga sakop sa City Environmental Sanitation Enforcement Team kay nangreklamo na ang iyang mga silingan.

Sigun sa report nga miabot sa opisina ni CESET chief Grace Luardo nga human gitaktak sa pagka-BEO si Binolirao nagpabadlong na kini pinaagi sa pagbutang mismo sa iyang basura atubangan sa iyang balay.

Matud ni Luardo  nga gipadad-an niya og iyang mga sakop ang atubangan sa panimalay ni Binolirao kay aron pagsuta kun tinuod ba ang reklamo nga ilang nadawat.

Si Luardo miingon nga nangreklamo na ang mga silingan ni Binolirao kay baho kaayo ang mga basura.

Dugang ni Luardo nga si Binolirao kinahanglan nga mo-settle sa iyang kalapasan aron dili siya mapasakaan og kaso adto sa hukmanan ug mag-atubang og daku pa nga problema.

Gilatid hinoon sa ordinansa sa dakbayan nga kadtong mga madakpan sa pagpataka lang paglabay sa ilang mga basura ug wala’y ikabayad nga multa mahimo ra sila nga moserbisyo pinaagi sa pagpanilhig sa publiko nga mga dapit.

Ang mga sakop sa CESET gitudloan g’yud ni Luardo nga dili mahadlok nga moisyu og citation ticket bisan kinsa pa ang matumngan kun masakpan sila nga magpataka og labay sa mga basura sa publiko nga lugar.

Ang basura nga ilabay kinahanglan usab nga gibuwag-buwag na’ng daan ang mga malata ug dili malata aron dili sila makalapas sa balaod og makabayad ug multa.  (BANAT NEWS)