CCTV footage tan-awon lang dili pangayoon

CEBU, Philippines - Ang hepe sa Cebu City Command Center (C3) nga si Konsehal David Tumulak miawhag sa mga ahensiya nga nag-imbestigar sa pagpangibot sa 88 ka indigenous trees sa Sergio Osmeña Avenue nga tan-awon lang ang footage sa Close Circuit Television (CCTV) camera ug dili pangayoon.

Matud ni Tumulak nga ang DENR, mga opisyal sa dakbayan, mga imbestigador ug ang mga opisyal sa DPWH mahimo nga motan-aw sa footage nga nakuha sa mga CCTV camera sa dakbayan.

Tumong ni Tumulak nga dili mabulgar ang nahimutangan sa ilang CCTV camera. Kun ayuhon pagtan-aw ang footage mahimo nga matultolan kun asa gibutang ang mga CCTV camera.

“We just want to preserve the evidence and not to divulge publicly the place where we installed the camera for the security of the entire city,” si Tumulak mi-esplikar ngadto sa mga reporters.

Ang mga reporters gipatan-aw ni Tumulak sa mga kuha sa CCTV atol sa pagputol ug pag-buldozer sa mga kahoy nga diha nagbarog sa taliwala sa Serging Osmeña Avenue.

Base sa CCTV footages,  makita nga gipangputol ang mga kahoy ug gikarga kini sa duha ka truck nga kolor blue ug puti. Ang puti adunay plaka nga GEY-540.

Sa pakisusi sa buhatan sa Land Transportation Office (LTO), ang mga truck giingong narehestro sa WT Construction nga maoy naghimo sa road repair project sa S. Osmeña Avenue.

Ang mga sakop sa Metro Cebu Water District (MCWD) miduaw usab sa buhatan ni Tumulak ug mitan-aw sa CCTV footage human sa pasangil sa contractor nga ang MCWD maoy hinungdan sa pagkatumba sa mga tanom sa center island  human nagbaha tungod sa ilang tubo nga nabuslot.

Ang taga MCWD miingon nga bakak ang mao nga taho. (Kristine B. Quintas/BDB)

Mayor JVR giilad

Usa ka karenderiya sa Cebu South Coastal Road, dakbayan sa Talisay nasakpang walay business permit human si Mayor Johnny De los Reyes gipatuo nga karne sa kanding ang gi-serve apan karneng baboy diay.

Si Mayor JVR usa ka Adventist ug di mokaon og karne’ng baboy.

Niadtong milabay’ng Domingo mikaon ang mayor sa usa ka karenderiya sa nahisgutang lugar ug miorder og kalderita apan ang gihatag kaniya karneng baboy. Gisuta sa mayor ang papeles sa karenderiya ug nasayran nga expired na diay ang business permit niini hinungdan gipasidan-an kini sa mayor nga mo-renew sa ilang business permit. Hinuon gipasaylo ra usab sa mayor ang tag-iya sa nahisgutang karenderiya.

Nunot niini, ang mayor mipasidaan sa tanang mga establisamento diha sa Talisay nga motuman sa mga rekisitos aron makalukat o maka-renew sa ilang business permit. (/RUB)(BANAT NEWS)