600 kilo nga tulingan gisakmit

CEBU, Philippines - Kapin 600 ka kilo nga isdang tulingan ang nasakmit sa Anti-illegal Fishing Task Force sa probinsya sa Sugbo sa dakbayan sa Talisay nga gituohang nakuha pinaagi sa illegal fishing. Unang nasikop niadtong Martes sa buntag ang F/B Reym Joy tungod sa paggamit og pino nga pukot nga kalapasan sa balaod. Ang kapitan sa maong panagatan giila nga si Celso Remarca, 59, taga-barangay Looc sa dakbayan sa Danao uban sa 14 ka mga tripulante niini.  Nasakmit kanila ang 350 ka kilo nga tulingan. Paglabay sa pipila ka oras, nadakpan usab ang laing panagatan nga nakuhaan usab og 170 ka kilo nga tulingan. Ang F/B Gretchen nga gidala sa kapitan nga si Modesto Gonzaga, taga-Danao City adunay 25 ka mga crew. Laing nadakpan mao F/B Jesnor nga gidala sa usa ka Pablito Hermosilla ug uban sa 12 ka crew ug nakuhaan sila og 150 ka kilong tulingan.

Matud ni Loy Anthony Madrigal, ang hepe sa task force, nga mireklamo kanila ang mga gagmay’ng mananagat kabahin sa pagpangisda sa maong mga dagkong panagatan.

“Akong mga kuyog small fisherfolks sa Talisay nga maoy mga complainant. Dugay-dugay na ning surveillance nato. Ang mga gagmay intawon natong mananagat, wa na gyud daw silay kuha,” sigon ni Madrigal. Ang tulo ka panagatan giangkorahe karon sa Naval Forces Central sa dakbayan sa Lapu-Lapu samtang gibuhian ang mga crew. Itugyan ngadto sa Provincial Social Welfare and Development Office ang mga tulingan aron ipangapod-apod sa mga gagmay’ng mangingisda. Samtang ang Provincial Environment and Natural Resources Office gikatakdang mopasaka og kaso batok sa mga tag-iya sa maong mga panagatan. (BANAT NEWS)