Duha ka tawo nalumos sa dagat

CEBU, Philippines - Duha ka tawo napalgan’g patay na nga naglutaw sa dagat didto sa dakbayan sa Lapu-Lapu ug lungsod sa Cordova kagahapon.

Ang lawas ni Jayson Maloloy-on, 20, naglutaw kini ilawom sa Marcelo B. Fernan Bridge sa Barangay Pusok, dakbayan sa Lapu-Lapu kagahapon sa buntag.

Sa laing bahin, ang lawas ni Nestor Avila, 42, minyo nga taga Sitio Puso, Barangay Poblacion, Cordova napalgan usab nga naglutaw sa kadagatan sa Barangay Buagsong.

Sa imbestigasyon nila ni PO3 John Carlo Jocutan ug PO2 Jerson Alparito nga kaniadtong Martes sa hapon naligo si Maloloy-on ilawom sa taytayan gamit ang usa ka styropor nga taklob sa ice box.

Aduna’y nakasaksi nga tungod sa kakusog sa sulog sa tubig sa dagat nakabuhi si Maloloy-on sa gigunitan niya nga styropor ug kalit kini’ng mitidlum sa dagat.

Ang mananagat nga si Angelo Caballero maoy nakakita sa lawas ni Maloloy-on nga naglutaw na sa dagat kagahapon sayo sa buntag. Ang igsoon ni Maloloy-on miingon nga ang biktima dili maantigo molangoy.

Samtang kadtong gituohan’g nalumos usab sa Cordova gituohan nga nakainom ug posible nga natagak sa lawom nga bahin sa dagat.

Sa imbestigasyon sa kapolisan nasuta nga naligo ug nanagat si Avila nga nakainom. (BANAT NEWS)