Wanted nga nagtago sulod sa 23 ka tuig nadakpan

CEBU, Philippines -  Nasikop sa Criminal Investigation and Detection Group (CIDG)-7 ang usa ka wanted nga nagtago-tago sulod sa 23 ka tuig sa barangay Bao, lungsod sa Alamada, North Cotabato.

Si Ronald Baykin, taga dakbayan sa Cadiz, giingong suspetsado sa pagpatay sa usa ka Remy Caina sa Lila, Bohol nadakpan kaniadtong Sabado.

Si Baykin nga usa sa most wanted sa isla sa Bohol duna’y patong sa ulo nga P75,000.

Armado ang kapolisan og warrant of arrest nga giisyu ni Regional Trial Court (RTC) Judge Achilles L. Melicor sa Tagbilaran City batok ni Baykin.

Matud ni CIDG-7 chief Ritchie Posadas nga sulod sa tulo ka bulan na nga nangita sila ni Baykin ug nakadawat sila og report nga ang suspetsado didto magtago-tago sa Mindanao.

Si Baykin nanghimakak sa pasangil batok kaniya ug wala usab siya’y kalibutan nga aduna siya’y warrant of arrest ug mibawos sa pagpasangil nga “planted” ra ang ebidensiya nga pusil nga naimbargo gikan kaniya. 

Gawas sa kaso’ng murder, nag-atubang usab si Baykin og kaso’ng illegal possession of firearms.

Si Posadas miingon nga human nakahibalo si Baykin nga pinangita na siya sa balaod misibat dayon kini ngadto sa Negros ug milayas paingon sa Mindanao.

Si Baykin maoy ika-19 nga most wanted nga nasikop sa mga sakop sa CIDG-7 sukad niadtong miaging tuig.  (BANAT NEWS)