4 na ang patay sa tipdas sa CV

CEBU, Philippines -  Gitug-an sa Department of Health (DOH-7) nga may upat na ka mga tawo ang namatay sa tipdas gikan sa bulan sa Enero hangtud ning bulan sa Abril.

Sigon pa sa buhatan ni Regional Epidemiology and Surveillance Unit (RESU-7) head Renan Cimafranca nga ang upat nga nakalas naggikan sa siyudad sa Sugbo, Talisay, Naga ug sa Sibonga.

Ang RESU-7 nakatala og 520 ka kaso sa tipdas gikan sa Enero hangtud ning bulana. Nag-una gihapon sa dunay kinadaghanan og  nataptan og tipdas mao ang siyudad sa Sugbo nga may 217 ka kaso ug usa ang patay, gisundan sa siyudad sa Lapu-Lapu nga may 50 ka kaso, Mandaue City may 23 ka kaso, lungsod sa Balamban may 17 ka kaso, Loon sa probinsiya sa Bohol nga may 12 ka kaso, siyudad sa Dumaguete nga may 10 ka kaso ug lungsod sa Consolacion, Liloan nga pulos dunay tag siyam ka kaso ug ang Minglanilla nga may 9 ka kaso apan usa ang patay. Ang DOH-7 ning bag-ohay lang mipahibawo sa hingusgang pagpamakuna sa kabataan sa kalungsuran sa probinsiya.

Giawhag usab niini ang mga ginikanan nga pabakunahan gyud ang ilang mga anak aron dili mataptan sa tipdas kay kini makatakod ug makamatay kun kini pasagdan. (BANAT NEWS)