Walay adik sa Talamban

CEBU, Philippines -  Ang kapin sa 100 ka kawani sa Barangay Talamban, dakbayan sa Sugbo gipakalitan pag-drug test kagahapon sa mga sakop sa City Office for Substance Abuse Prevention (COSAP) apan wala’y bisan usa kanila nga namatud-an’g adik sa gidili’ng drugas.

Nahinangop kaayo si COSAP chief Alice Utlang nga walay bisan usa sa mga kawani sa Talamban nga na-positibo sa gidili nga matang sa drugas.

Si Kapitan Dario Arcilla sa Barangay Talamban maoy mihangyo sa COSAP nga himoan og drug test ang iyang mga kawani aron pagsuta kun may tiggamitan ba og gidili’ng matang sa drugas kanila.

Ang Talamban maoy ika-18 na ka barangay dinhi sa dakbayan sa Sugbo ka’ng kansang mga opisyal ug kawani gihimoan og kinalit nga drug test sa mga sakop sa COSAP.

Matud ni Utlang nga sa 18 ka barangay nga nahimoan nila og drug test, tulo lang ka barangay ang walay napositibo sa mga kawani. Ang lain nga duha ka barangay nga walay adik nga kawani mao ang Barangay Taptap ug Pulangbato.

Sa laing 15 ka barangay pulos g’yud adunay mga napositibo sa illegal nga drugas ug sagad mga basurero, drayber ug tanod nga gitugyanan unta sa pagpatuman sa balaod apan sila na hinoon ang dakponon.

Si Utlang miingon nga nahinangop kaayo si Mayor Michael Rama pagkasayod nga wala g’yuy bisan usa nga napositibo sa gidili nga drugas sa mga kawani sa Barangay Talamban.

Ang nahibudngan ni Utlang kun ngano nga sagad sa mapositibo sa shabu mga sakop man sa garbage collection ug adunay pipila ka tanod nga gitahasan gani unta sa pagpatuman sa balaod.  (BANAT NEWS)