Inside job ang kawat sa Japer Marketing?
CEBU, Philippines - Nagduda ang kapolisan sa Mandaue nga adunay mga kawani sa Japer Marketing sa Barangay Tingub nga nalambigit sa pagpangawat sa kaugalingon nila nga trabahoan og mikuha sa P110 mil.
Ang nakapaduda sa kapolisan kay wala’y mga naguba nga bahin sa balay-patigayon, wala magkatag ang mga butang ug ang safe vault sa opisina apil pa nga nabuksan.
Nadiskobrehan ang pagkahanaw sa mao nga salapi lapas ang alas 11 kagahapon sa buntag.
Matud ni Senior Inspector Philip Silva, hepe sa Presinto 4 sa Mandaue City Police Office (MCPO), ang manager sa tindahan nga si Pelagio Monragon maoy nagtaho kanila sa nahitabo sa iyang opisina.
Si Silva miingon nga kadudahan kaayo nga “inside job†ang mao nga pagpangawat kay imposible nga ang mga kawatan makaabli sa safe vault nga adunay kombinasyon sa numero.
“Dili makahimo pag-abli sa vault ang kawatan nga wala masuhito sa kombinasyon sa numero alang sa pag-abli,†matud ni Silva.
Nagtuo hinuon ang mga kawani sa maong tindahan nga nakasulod ang kawatan sa maong tindahan pinaagi sa pagtangtang sa bildo nga bintana ug gibalik lamang usab kini pagtaud sa ilang paggawas.
Tungod sa katahap sa inside job gipangkuhaan sa kapolisan og fingerprints ang tanang kawani pinaagi sa Scene of the Crime Operation (SOCO) sa PNP Crime Laboratory. (/RUB)(BANAT NEWS)
- Latest
