Simbahan sa toledo gikawatan na sab

CEBU, Philippines - Nabiktima na usab sa pagpangawat ang simbahan sa St. John de Sahagun parish sa wala ilhing kawatan sa barangay Poblacion siyudad sa Toledo.

Ang kura paruko sa maong simbahan nga si Fr. Rolando Manayon, 63, ug ang sekretarya niini nga si Romelyn Deiparine, 28, midangop sa kapolisan kalabot sa nahitabong pagpangawat.

Matud ni PO1 Jonathan Cuizon, duty desk officer sa Toledo City Police Stationnga nahinabi sa Banat News nga naabtan na lang ni Fr. Manayon nga nagkagubot na ang mga gamit sulod sa iyang lawak ug natangtang ang upat ka bildo sa jalousie nga bintana nga gituohang maoy giagian sa kawatan. Nakuha ang di momenos sa P3,000 nga koleksiyon sa simbahan gisulodsa sibot ug laing salapi nga wala pa matino ang kantidad.

Padayong giimbestigahan sa kapulisan ang maong panghitabo samtang gitan-aw usab ang posibilidad nga inside job ang nahitabo.

Dili lang kini ang unang higayon nga gikawatan ang simbahan sa koleksyon niini, niadtong nakalabay nga buwan gikawatan usab kini. (BANAT NEWS)