Kapin P.5M nasakiyo gikan sa duha ka gilungkab nga establisamento
CEBU, Philippines - Dul-an sa tunga sa milyon ang kantidad nga nakuha sa wala mailhing lalaki nga milungkab sa usa ka shop sa usa ka mall sa barangay Banilad sa dakbayan sa Sugbo.
Ang tag-iya sa shop naila nga si Dexter Remedio Bongo, 42, molupyo sa Banilad. Si SPO1 Fredilson Codilla sa Crime Scene Investigation Unit nga nahinabi sa Banat News/The FREEMAN miingon nga nadiskobrehan sa biktima nga gilungkab ang iyang shop sa alas 6:00 kagahapon sa buntag.
Base sa imbestigasyon, nakasulod sa sliding glass window ang kawatan nga nakuhaan pa og footage sa CCTV. Nakuha sa lalaki ang mga unom ka DSLR cameras, ug mga duha ka cellphone, bag, ug salapi nga mokabat tanan og tunga sa milyon ka pesos.
Nagduda ang kapolisan nga taga-diha ra sa lugar ang kawatan.
Samtang nahanaw ang P76,000 nga cash ug mahalon nga mga butang sa usa ka lending firm nga gilungkab sa miaging gabii ug alas-7 na pasado kagahapon sa buntag nga nadiskubrehan. Ang gilungkab mao ang Mabuhay Lending Company nga gipanag-iya ni Clemente Bercede Pontanar, 76, nagpuyo usab sa maong dapit nga usa usab ka compound.
Si SPO2 Juan Calamba sa kapolisan sa Presinto 5 sa Mandaue City Police Office (MCPO) miingon nga nakasulod ang mga wala hiilhing kawatan pinaagi sa pagtangtang sa window grill. Gilungkab ang drawer sa lamesa ug gikuha ang cash, Rado nga relo de pulso nga nagkantidad og P60,000, Seiko nga relo nga P12,000 ang kantidad ug touch screen nga cellphone. (/EIM)(BANAT NEWS)
- Latest
