Sungogan gidunggab patay
CEBU, Philippines - Usa ka lalaki’ng giingong duna’y problema sa pangisip midunggab patay sa lalaki nga kanunay nga manungog kaniya niadtong Martes sa hapon didto sa Sitio Salvacion, Barangay Maguikay, dakbayan sa Mandaue.
Ang biktima mao si Alejo Dumayo, 22, nga residente sa maong dapit ug nakaangkon og samad dinunggaban sa iyang dughan nga maoy hinungdan sa iyang kamatayon.
Ang suspetsado mao si Edgar Contreras, 22, nagpuyo usab sa Sitio Salvacion mitug-an ni SPO1 Renato Canja sa Presinto 3 sa Mandaue City Police Office nga kanunay siya’ng sungogon sa biktima.
Matud ni Contreras nga wala na siya makaagwanta sa sige og sungog ni Dumayo hinungdan nga mipalit siya og kutsilyo sa usa ka department store ug giatangan niya ang biktima ug gidunggab.
Ang suspetsado nga nasikop sa kapolisan human sa hitabo giingong nasulod na kini sa Drug and Rehabilitation Center sa Don Vicente Sotto Memorial Medical Center. (BANAT NEWS)
- Latest
