Toledo budget dili balido
CEBU, Philippines - Dili balido ang 2014 Annual Budget sa dakbayan sa Toledo kay tulo lang ka konsehal ang nagpasar niini.
Kini ang baruganan sa mayoriya sa Toledo City Council nga giduso og manifesto sa buhatan ni Mayor John Henry Osmeña ug sa ubang ahensiya sa gobyerno.
Ang manifesto gipirmahan sa unom ka konsehal nga sila si Konsehal Ricardo Pepito, Antonio Borja Jr., Rogelio Caburnay, Louis Nicholas Espinosa; Helen Jill Espinosa, tsirman sa committee on appropriations, ug Edgardo Aguilar.
Si Konsehal Marjorie Perales, sakop sa mayoriya apan wala nakapirma sa maong dokumento.
Matud pa sa grupo nga gipasar ang budget niadtong Marso 27 nga walay korum sanglit ang nitambong sila lang si Konsehal Pepito, Jill Espinosa, Merly Abad, Zosimo Abellanosa, Leo Dolino ug Bise-Mayor Antonio Yapha Jr.
Sa pagkakaron, ang konseho gilangkuban sa bise-mayor ug 10 ka konsehal samtang usa bakante.
Ang grupo miinsister nga kinahanglan ang presensiya sa pito ka sakop aron mapadayun ang sesyon apan gipadayun gyud kini ni Yapha hinungdan nga gisupak ni Pepito ug Espinosa ug gideklarar ang dos minutos nga recess.
Giingong nalipat silang Pepito ug Espinosa sa dihang gipadayun ni Yapha ang sesyon nga wala pa napupos ang dos minutos nga recess ug daling gipasar ang budget nga sila lang si Dolino, Abad ug Abellanosa ang nagpabilin. (BANAT NEWS)
- Latest
