P1.6M nga katol gisakmit sa Customs

CEBU, Philippines - Gisakmit sa  Bureau of Customs-Cebu ang 40-footer container  vans nga adunay sulod nga mga mosquito coils o "katol" nga nagkantidad og P1.6 million.

Base sa dokumento nga nakuha sa Banat News, ang duha ka container vans niabot dinhi sa Sugbo Marso 15 ug 22 ning tuiga.

Ang maong kargamento gi- consign sa Stargaze Enterprises nga naa nahimutang sa  Tudtud St., Mabolo, Cebu City.

Ang maong kargamento gisakmit niadto pang Biyernes ubos sa alert order nga giluwatan ni Capt. Jerry Arrizabal, district commander, Customs Police Division, Bureau of Customs Port of       Cebu. Ang duha ka kargamento gisakmit human napamatud-an nga  wala kini Certificate of Product Registration gikan sa Food and Drugs Administration.

Usa sa mga container vans gi-inspeksiyon na niadtong adlawa  ug nasuta nga duna kini sud nga 2,150 cartoons sa katol nga adunay brand name nga "Jaguar."

Matud pa ni BOC Port of Cebu district collector Roberto Almaden, ang warrant of seizure and detention wala pa maisyu kay inspeksyonon pa man ang usa ka container van sulod ning semanaha. /EIM (BANAT NEWS)