Nag-rally sa Talisay gibabagan

CEBU, Philippines - Wala g’yud makasulod sa Talisay City Hall ang mga nag-rally nga gilangkoban sa mga magtutudlo, tinun-an ug ginikanan nga nagtinguha unta nga makigkita ni Mayor Johnny V. delos Reyes.

Gibabagan sa mga sakop sa Civil Security Unit (CSU), blue guards ug Flying Squads ang mga raliyista nga nag-rally likod sa City Hall kagahapon sa hapon. Ang mga raliyista miawhag sa pagpahulip ni Dr. Paulus Mariae Cañete nga gitudlo sa mayor nga presidente sa TCC nga gihulagway nila nga naghatag lang og kasamok sa tunghaan.

Si Cañete gitudlo ni Mayor JVR pinaagi sa executive order apan wala’y endorsement sa Board of Trustees sa TCC.

Mireklamo ang mga raliyista nganong dili sila pasudlon sa City Hall nga unta buot ra man sila nga makig-istorya sa mayor.

Ang mga magtutudlo’ng miapil sa rally mao sila si Elmer Montejo, English instructor ug July Ann Cajes, Social Science instructor.

Si Loulette Zafra, registrar sa TCC, kinsa misalmot sa rally nagkanayon nga usa sa ilang reklamo mao nga sulod na sa tulo ka buwan silang mga non-teaching staff sa TCC wala pa gihapon makadawat og sweldo samtang sila si Montejo ug Cajes usa ka buwan na kining wala sweldohi tungod kay mitabang man sila pag-organized sa gipahigayong graduation niadtong Marso 26 sa acting president sa TCC nga si Richel Bacaltos.

Ang mga ginikanan ug estudyante nga miapil sa rally mikwestiyon sa saad sa mayor nga usa lang ka graduation ang ipahigayon apan kagahapon nagpahigayon kini og laing graduation atubangan sa City Hall. Wala atubanga sa mayor ang mga raliyista kay gusto niya nga adto sila sa opisina abi-abihon. /RUB (BANAT NEWS)