Nasunogan sa Lorega gitabangan sa senador

CEBU, Philippines - Gisaway ni Senador Peter Allan Cayetano ang kadagkoan sa lainlaing ahensya sa nasudnong kagamhanan nga nagkiyugpos lang sa ilang mga bukton ug wala motabang sa mga biktima sa dagko nga mga sunog.

Si Cayetano nga mibisita sa mga biktima sa sunog sa Barangay Lorega-San Miguel kagahapon sa buntag miingon nga halos tanang tabang ngadto sa nasunogan gikan ra sa kagamhanan sa dakbayan sa Sugbo.

Gihimo’ng sanglitanan sa batan-ong senador nga unta ang National Housing Authority (NHA), ang Department of Health (DOH) ug uban pa moresponde dayon aron sila makatabang sa nasunogan.

Ang gipasabot ni Senador Cayetano mao nga ang NHA mohimo dayon unta og pakisusi kun unsa’y matabang sa ilang ahensya nga ang ubang biktima makapatukod pagdali og panimalay.

Matud sa senador ang DOH kinahanglang motabang sa pagtan-aw sa panglawas sa mga nasunogan nga anaa ra temporaryo nga nag-estar sa lainlaing evacuation centers sa Barangay Zapatera ug Day-as.

Sa pagduaw ni Cayetano sa evacuation centers sa nasunogan sa Barangay Lorega, dala niya ang P750 mil ug ang kada pamilya nga nasunogan gipanghatagan og ‘tag P500.

Ang kwarta gipanghatag pinaagi sa mga sakop sa Department of Social Welfare and Services (DSWS) sa dakbayan sa Sugbo. Matud ni Cayetano nga ang kwarta natigum niya gikan sa iyang mga paryente ug mga higala nga nakumbinsir niya nga tabangan ang mga biktima sa sunog.

Si Cayetano nagkanayon nga kinahanglan g’yud unta nga ang kadagkoan sa mga national government agencies molihok dayon kun adunay mga dagko nga katalagman nga mahitabo dili kay isalig ra nila sa mga opisyal sa lokal nga kagamhanan.

Matud ni Cayetano nga swerte lang nga ang katalagman dinhi mahitabo sa dakbayan sa Sugbo diin daku ang Calamity Budget apan kun didto pa sa usa ka pobre nga LGU, hilabihan ka pait ang kahimtang sa mga biktima. Gipakigtagboan ni Senador Cayetano ang mga lider sa fire victims ug giawhag sila nga maghugpong aron nga kadtong adunay gusto nga motabang kanila direkta na nga mohatag og hinabang nga dili na ipaagi sa kagamhanan.

Si Cayetano miingon nga kun makamugna na og kahugpongan ang mga biktima sa sunog maninguha siya nga makatabang paghatag kanila og “seed money” alang sa ilang mga livelihood projects. (BANAT NEWS)