CCMC, CCRRMO way ambulansya ug emergency rescue vehicles

CEBU, Philippines - Si Konsehal David Tumulak sa dakbayan sa Sugbo mihangyo sa Konseho nga aprobahan na ang pundo alang sa iyang gi-request nga duha ka ambulansya ug rescue vehicle para sa Cebu City Medical Center (CCMC) ug Cebu City Risk Reduction Management Office (CCRRMO).

Si Tumulak nagkanayon nga samtang ang mga kabarangayan adunay mga ambulansya, ang CCMC ug CCRRMO sa kagamhanan sa Sugbo wala’y ambulansya ug emergency rescue vehicle. “Supposedly these offices are the first responders and assume in the forefront and very critical role in times of disaster and calamity,” matud pang Tumulak, kinsa chairman usab sa Committee sa CCRRM Council.

Ang usa ka ambulansya nagkantidad og P1.5 million samtang nagkantidad og P2 million ang U.S.- typed emergency rescue vehicle nga kumpleto na sa mga ekipo.

Si Tumulak miawhag sa Konseho nga i-charge sa pundo sa Philippine Amusement and Gaming Corp. (Pagcor) sa dakbayan ang maong kantidad.

Sa gipahigayon nga sesyon sa Konseho sa miaging Miyerkules, nagkahiusa ang mga konsehal nga i-refer sa Committee on Budget and Finance ang maong sugyot ni Tumulak, una kini posibleng aprobahan.

Si Tumulak nagkanayon nga giaprobahan na ni Mayor Michael Rama ang iyang request sa maong mga sakyanan ug nanghinaut nga aprobahan ra usab kini sa Konseho.

Gipakita sa konsehal nga base sa historical data, ang dakbayan sa Sugbo kinahanglan moresponde sa di muminos 1,680 ka mga emergency calls kada buwan. 

Ang Emergency Rescue Unit Foundation (ERUF) dunay unom ka ambulansya nga gi-operate sa tibuok syudad samtang ang Barangay Basak Pardo Emergency Response (BPER) dunay tulo. Ang ubang ambulansya gi-operate na sa mga nagkadaiyang pribadong ospital.

“With high demands on emergency cases and to further improve delivery of health services especially on transporting patients, it is imperative to acquire additional ambulance to better serve our constituents,” sigon pa ni Tumulak. (Niña Sumacot-Abenoja/EIM)

Duha ka lugar sa Sugbo rabies free na

Sa pagsaulog sa National Rabies Awareness Month duha ka lugar sa probinsiya sa Sugbo ang gikatakdang i-endorso nga rabies-free zones sa nasud niining tuiga.

 Si Provincial Veterinarian Mary Rose Vincoy nagkanayon nga ang Bantayan Island ug Barangay Zaragosa sa lungsod sa Badian ang kwalipikado sa national declaration nga rabies-free zones. Matud ni Vincoy nga ang maong mga lugar wala’y mga natalang kaso sa rabies sulod sa duha ka tuig ug mituman sa international requirement sa 70 porsiyentong vaccination sa gidaghanon sa mga iro sa ilang lugar. Ang maong mga lugar duna usab kini dog surveillance ug aktibo usab nga giimplementar ang ilang ordinansa sa anti-rabies ug task force. Ang declaration ipahigayon karong Septiyembre 28, 2014 atol sa pagsaulog sa World’s Rabies Day. Niadtong tuig 2011, ang Department of Health mideklara sa Isla sa Camotes ug Malapascua nga mga rabies-free-zone sa nasud. Ang Provincial Veterinarian Office nanawagan kini sa mga tag-iya og iro sa pagpabakuna sa ilang mga binuhing hayop. (BANAT NEWS)