Rally atol sa graduation sa Talisay City College
CEBU, Philippines - Mga estudyante, magtutudlo ug ginikanan gikataho nga mag-rally atol sa ipahigayong graduation ceremony nila ni Talisay City Mayor Johnny V. De los Reyes ug sa gitudlo niya’ng presidente sa Talisay City College (TCC) nga si Dr. Paulus Mariae Cañete.
Ang maong graduation ceremony gikatakda nga ipahigayon karong alas 3:00 sa hapon atubangan sa Talisay City Hall. Si Talisay City Administrator John Yre De los Reyes mibutyag nga napasahan siya og text message diin ang tipik niini nagkanayon nga “willing na mo mag-rally?, okay na mi, mag-rally na ta sa Lunes. Go na mi nila Ms. Cajes and Montejo, okay na ang 4th year students and parentsâ€. Matud ni De los Reyes nga ang maong text message posibleng gikan sa mga kaalyado ni Richel Bacaltos.
Si Bacaltos maoy gitudlo sa Board of Trustees (BOT) nga molingkod isip acting president sa TCC.
Ang city administrator nagkanayon nga niadtong Marso 26 sa gipahigayong graduation ceremony nila ni Bacaltos wala sila’y gihimong lakang tungod kay ila kini nga girespetohan.
Niadtong higayona buot untang motambong ang mayor apan wala siya giimbitar ug wala usab diha sa program sa graduation ang iyang pangalan. Si Bacaltos namalibad nga wala siya’y kasayuran sa giingong rally apan dunay mga magtutudlo nga nasagmuyo kay ang mayor wala makahatag og tukma nga tubag ngano nga usa na ka buwan nga wala sila’y sweldo ug ang non-teaching personnel tulo ka buwan na nga wala sweldohi.
Si Bacaltos nagduda nga posible nga tungod sa kasagmuyo sa mga ginikanan, estudyante ug mga magtutudlo mao nga magpahigayon kini og rally. (BANAT NEWS)
- Latest
