Dul-an 500 ka tawo ang nasalbar gikan traffickers
CEBU, Philippines - Sulod sa tulo ka tuig 403 na ka tawo ug 54 ka menor de edad ang na-rescue sa Regional Anti-Human Trafficking Task Force 7 sulod lang sa 30 ka managlahing operasyon.
Karong tuiga lang 12 na ka mga tawo ang na-rescue lakip na ang unom ka mga menor de edad. Samtang sa tuig 2011 ang na-rescue sa kapolisan miabot og 212 ka mga tawo lakip na niini ang 18 ka mga menor.
Sa tuig 2011 ug sa 2014 ang mga naaresto naglakip lang sa mga Filipino sukwahi sa 2012 ug 2013 nga may Australian, American ug Swedish nationals nga nasikop.
Matud pa ni Sr. Insp. Mark Gifter Sucalit nga kasamtangang gipanid-an nila ang ubang mga balay patigayon sa rehiyon ug mga tawo o grupo nga nalambigit sa human trafficking.
Apan iyang giklaro nga wala pa silay na-monitor nga mga English tutorial centers nga naghimo sa human trafficking sama sa gibuhat didto sa kaulohan.
Pipila ka bulan ang milabay may nasikop nga usa ka Chinese national ug usa ka Filipino manager sa usa ka call center company tungod sa pag-operate og usa ka pornographic website.
Sa miaging semana usa ka Swedish national usab ang nasikop sa RAHTTF7 ug sa kapolisan sa dakbayan sa Talisay ug sa Inter Agency Council Against Trafficking (IACAT) human kini gikataho nga nalambagit sa human trafficking. (BANAT NEWS)
- Latest
