Talisay PNP nangayo’g tabang sa katawhan

CEBU, Philippines - Ang bag-ong hepe sa kapolisan sa Talisay mipasabot nga magmalampuson sila pagsumpo sa ilegal nga kalihukan kun ang katawhan aktibo nga moabag kanila sa kampanya.

Si Superintendent Reycel Carmelo Dayon mipasabot nga ang katawhan apil sa gitawag og “Five Pillars of Criminal Justice System” ug sigurado nga mapiang ang sistema kun walay abag sa katawhan.

Giangkon ni Dayon nga usa ka dakung hagit kanila’ng kapolisan ang pagsumpo sa mga ilegal nga kalihukan sa Talisay apan nagkinahanglan gayud sila’g tabang sa publiko.

Ang Five Pillars of Criminal Justice System gilangkoban sa Community nga mao ang katawhan, ang Law Enforcement, Prosecution, Judiciary ug ang Correction.

Gipasabot ni Dayon nga sa iyang kasinatian pagpanerbisyo isip polis nakita niya nga ang katawhan kinahanglan usab nga manggilabot pagsumpo sa krimen pinaagi sa paghatag og kasayuran kabahin sa mga naghimo’g salaod.

Matud ni Dayon nga usa sa dakung hagit ang pag-edukar sa mga ilegalista aron kini makasabot ug mohunong sa ilang ilegal nga binuhatan.

Si Dayon miingon nga sagad sa mga ilegalista ang rason nila mao ang kalisud sa panginabuhi mao nga misulod sila sa ilegal.

Miingon si Dayon nga ang mga nakalapas sa balaod kinahanglan sila nga pasabton ug agakon sa gobiyerno aron mobiya sa ilang dautang binuhatan.

Si Dayon milingkod isip hepe sa kapolisan sa Talisay puli ni Superintendent Resty Santos niadtong milabay’ng Huwebes.

Usa sa proyekto nga buot ipatuman ni Dayon mao ang pagpadayon sa pagpanaud og mga Closed-Circuit Television (CCTV) camera sa lainlaing dapit sa Talisay.  (BANAT NEWS)