Duha nadakpan sa buy-bust

CEBU, Philippines - Nasikop sa mga sakop sa City Anti-Illegal Drugs Special Operations Task Group (CAIDSOTG) ang duha ka lalaki samtang nakaikyas ang usa nga subject sa buy-bust operation pasado ala-una sa miaging kaadlawon sa sitio Cahipa sa barangay Hipodromo sa dakbayan sa Sugbo.

Ang nasikop naila nga sila si Jordan Rivera, 30, ug Rene Daub, 33, molupyo sa barangay Hipodromo samtang nakaipsot ang subject sa buy-bust nga si Marcelo Rivera, 32, igsuon ni Jordan. Pasado ala-una sa miaging adlaw ang mga sakop sa CAIDSOTG  miadto sa Hipodromo aron sa pagpalit og shabu ngadto kang Rivera.

Nakigsabot ang usa ka police poseur buyer ngadto kang Marcelo Rivera nga mopalit kini og usa ka pakete nga shabu nga mobalor og P100. Apan  nakabantay ang suspek nga polis ang nakigsabot kaniya hinungdan nga miikyas gilayon kini. Apan ang igsuon ni Marcelo nga si Jordan wa makaipsot sa kapolisan ug nakuhaan og duha ka medium size nga pakete, unom ka gamay nga pakete nga gituohang shabu, upat ka transparent plastic bag ug usa ka timbangan.

Samtang nasikop sab si Daub nga nakuhaan og disposable lighter ug drug paraphernalia. Ang duha gitanggong na sa stockade sa CCPO samtang padayon pa nga gipangita si Marcelo apan apil gihapon kini sa pasakaan og kaso karong Lunes.  (BANAT NEWS)