Grabeng kainit masinati sa Visayas

CEBU, Philippines -  Nipahimangno usab ang Philippine Atmospheric Geophysical and Astronomical Service Administration (Pag-asa) sa Mactan sa publiko nga nagsugod na ang pagsaka sa temperatura sa Sugbo ug sa Central Visayas tungod sa pag-igo sa El Niño o panahon sa sobrang kainit sa panahon.

Sumala pa sa labaw sa PAGASA-Mactan, Oscar Tabada, sa interbyu sa usa ka sibyaanan nga kagahapong adlawa niabot na sa 31 hangtud sa 32 Degree Celsius ang labing taas sa temperatura nga sagad masinati dinhi sa Sugbo.

Apan gitataw ni Tabada nga sa sunod bulan sa Abril gipaabot nga mosaka pa ang kainiton sa panahon nga moabot ngadto sa 34 Degree Celsius.

Tungod niini, si Tabada niawhag sa publiko nga dili magpainit sa adlaw kay ang sobrang kainiton sa panahon makadaut sa lawas ilabina niadtong mga tawo nga taas ang alta presyon ug ingon man sa panit ug sa mata.

"Ang implikasyon nato ining grabing init, delikado kaayo kini niadtong taas og (blood) pressure. Kahibawo ka na karon nga kining ozone layer nato which is nipis na kaayo, mokupot gyud ang kainit nga delikado kaayo sa mga tawo kining ultra violet radiation from the sun. Nipahigayon mi og information campaign nga dili gyud mobabad sa init gikan sa alas 10:00 sa buntag hangtud sa alas 3:00 sa hapon kay daghan na ang kaso karon sa skin cancer ingon man sa paghap sa mga mata," pahimangno pa ni Tabada.

Gipahibawo hinuon niini nga  masinati ang sobrang kainit sa panahon karong bulan sa Abril, hinuon makasinati usab ang pag-ulan-ulan sa bulan sa Mayo.   Apan mobalik ang sobrang kainit sa bulan sa Hunyo hangtud na sa Disyembre ning tuiga.

Gitumbok hinuon sa labaw sa Pag-asa nga adunay "15 percent probability" nga ang labing dakong epekto sa El Niño moigo sa last quarter ning tuiga gikan sa Oktubre hangtud sa Disyembre. Dugang pahi-mangno niini sa publiko nga buot nga maligo sa dagat   nga dili malimot sa pagbutang sa lawas og sun bloc aron dili kini masunog sa kainit sa adlaw.  (BANAT NEWS)