Nanglimpyo human sa Sinulog premyohan

CEBU, Philippines - Giuyonan sa Cebu City Council nga ang 1,495 ka kawani sa City Hall nga nagtinabangay paglimpyo sa kadalanan sa dakbayan human sa Sinulog Grand Parade kaniadto’ng Enero 19 pahatagan og ‘tag P2 mil nga pahalipay.

Si Konsehal Sisinio Andales, tsirman sa Committee on Social Services sa City Council, maoy misugyot og resolusyon aron paaprobahan sa mga kauban niya nga konsehal. Matud ni Andales nga ang mga sakop sa Program on Awards and Incentives for Service (PRAISE) maoy misugyot nga pahatagan og pahalipay nga salapi ang mga hingtungdang kawani.

Apil sa pahatagan og cash gifts mao kadtong mga kawani nga mihimo sa Devotee City nga gipapuy-an sa mga taga lagyo nga lugar nga mianhi sa dakbayan atol sa kapistahan ni Señor Sto. Niño.

Hinoon, bisan og ang Cebu City Council miuyon na nga ang dakbayan mogasto sa P2.9 milyones nga cash gifts, ang pagpanghatag sa salapi magdepende sa kamandoan gikan ni Mayor Michael Rama. (BANAT NEWS)