Walay rason nga ma-demoralize ang Highway Patrol––NBI

CEBU, Philippines - Ang mga opisyal sa National Bureau of Investigation (NBI) mitataw nga walay rason nga ma-demoralize ang mga sakop sa PNP Highway Patrol Group nga giimbestigar ang pipila kanila sa posibleng kalambigitan sa pagpatay ni Atty. Noel Archival.

Reaksyon kini ni NBI-7 Regional Director Max Salvador human nga ang ubang sakop sa Highway Patrol mitug-an sa media nga nangaluya sila nga gipasanginlan nga apil sa pagpatay ni Archival.

“Demoralized? Bakit? It’s not the NBI who created the reputation, I don’t see anything sa investigation.” matud ni Salvador. Matud ni Salvador nga wala siya’y nakitang sayop sa ilang gihimong imbestigasyon kalabot sa pagbanhig patay ni Archival ug sa duha niini ka kauban.

Si Salvador miingon nga adunay katungod ang mga nalambigit nga opisyal sa HPG-7 kun dili sila mohatag og affidavit kay gilatid man kini sa balaod nga may katungod sila nga magpakahilom.

Ang NBI mipahibalo na nga kun dili moatubang sa imbestigasyon ang mga opisyal sa Highway Patrol, ila dayon kini nga pasakaan og kaso. (Decemay P. Padilla/RUB)

Bus operators mireklamo pagsirado sa LTO– Subangdaku

Nagbagulbol ang mga bus operators sa kalit nga pagsira sa LTO- extension office sa Barangay Subangdaku, Mandaue nga modawat unta sa tanang "For Hire" registration transactions.

Ang presidente sa Cebu South Mini Bus Operators Association nga si Jolito Flores miingon nga wala sila makasabot nganong gisirad-an ang maong buhatan.

Matud ni Flores nga didto sa Subangdaku dili usab sila maproblema sa parking area alang sa ilang mga sakyanan nga iparehistro ug wala usab sila’y nakitang mga fixers.

Si LTO-7 Regional Director Arnel Tancinco mipasabot nga ang pagsira sa LTO extension office alang sa "For Hire" registration sa mga public utility vehicle gihimo kay gibase kini sa kamandoan nga giluwatan ni Department of Transportation and Communication (DOTC) Assistant Secretary Atty. Alfonso Tan Jr.

Ang kamandoan ni Tan nag-revoke sa Memorandum Order nga nagmugna sa LTO Extension Office sa Subangdaku, Mandaue nga nagtugot nga makapangrehestro og "For Hire" nga sakyanan.   (BANAT NEWS)