Peace deal selyado na

CEBU, Philippines -  Human sa dul-an duha ka dekada nga sabot-sabot tali sa gobyerno sa Pilipinas ug sa Moro Islamic Liberation Front (MILF) napirmahan na gyud ang Peace Agreement kagahapong adlawa nga gipanglantawan nga maghatag og kalinaw sa Mindanao.

Ang Comprehensive Agreement on the Bangsamoro (CAB) gipirmahan nila ni Miriam Coronel-Ferrer sa habig sa gobyerno ug ni Mohagher Iqbal sa habig sa MILF ug sa Malaysian Third Party Facilitator Tengku Dato’ Ab Ghafar Tengku Mohamed isip saksi.

Gitambongan sa kapin sa usa ka libo ka mga world leaders ang maong pinirmahay sa CAB lakip na niini si Malaysian Prime Minister Najib Razak ug Presidente Benigno Aquino III ug mga opisyal sa gobiyerno.

Ang maong sabot-sabot maoy basehan sa pagwagtang sa Autonomous Region in Muslim Mindanao (ARMM) ug sa pagtukod sa Bangsamoro political entity.

Ang CAB maoy magsilbing basihanan sa pag-umol sa Kongreso sa Bangsamoro Basic Law, aron nga opisyal na nga maila ang Bangsamoro political entity ug mapahigayon ang usa ka plebisito aron sa katukoran niini.

Ang Presidential Adviser on the Peace Process Teresita Quintos Deles miingon nga gikapoy na ang katawhan sa gubat, kakuyaw, gutom, ug sa pagpamakwit.

Si Malaysian Prime Minister Najib Razak mihangyo sa matag habig nga sundon unta nila ang intensyon sa napirmahan nga kasabotan.

Si Aquino sa iyang bahin miingon nga pakyas ang ARMM ug nanghinaot siya nga di mahisusama ang CAB sa ARMM.

Ang pinirmahay nahitabo sa Malacañang Palace kagahapong adlawa samtang liboan ka mga supporters sa maong kasabotan ilabi na sa Mindanao ang nagpista sa kalipay alang niini.  (BANAT NEWS)